‘తంతే బూరెల బుట్టలో పడ్డట్లు’ అన్న సామెత ఎంత వరకూ నిజమో తెలియదు కానీ, ఈ అమెరికన్ విషయంలో మాత్రం ఇది ముమ్మాటికీ నిజమైంది. వివరాల్లోకి వెళితే..
అమెరికాకు చెందిన ఓ వ్యక్తి సెకండ్ హ్యాండ్ జీప్‌ను కొనుగోలు చేశాడు. ఓ రోజు కారు పవర్ విండో పనిచేయటం ఆగిపోయింది. ఈ చిన్న మరమ్మత్తు కోసం మెకానిక్ వరకూ వెళ్లటం ఎందుకని, అతని చేతులకే పనిచెప్పాడు సదరు వ్యక్తి.
డోర్ ప్యానెల్ విప్పి చూడగా. అందులో ప్లాస్టిక్ పేపర్లలో చుట్టిన ఏడు కరెన్సీ కట్టలు (అన్నీ అమెరికన్ డాలర్లే) బయటపడ్డాయి. ఆ కరెన్సీ కట్టలో పవర్ విండో మెకానిజం‌కు అడ్డుపడి, పనిచేయటాన్ని ఆపివేశాయి.
డబ్బును చూసిన ఆనందంలో సదరు వ్యక్తి ఎగిరి గంతేసి, ఆ విషయాన్ని గోప్యంగా ఉంచకుండా ఇదిగో ఇలా ఫొటోలు తీసి సోషల్ నెట్‌వర్క్‌లో పెట్టాడు. పాత కారుతో పాటుగా కొత్త కారును కొనుగోలు చేసేంత డబ్బు కూడా లభించడం విశేషం. మరి లక్ అంటే అతడిదే కదా..!
