టాటా మోటార్స్ ఇటీవల ఆవిష్కరించిన సరికొత్త ‘టాటా నానో జెనెక్స్ ఈజీ షిప్ట్’ మోడల్‌ను ఈనెల 19వ తేదీన మార్కెట్లో విడుదల చేస్తామని కంపెనీ ప్రకటించింది. ఈ కొత్త 2015 టాటా నానో జెనెక్స్ కారు పాపులర్ ఆటోమేటెడ్ మ్యాన్యువల్ ట్రాన్సిమిషన్ (ఏఎమ్‌టి)తో లభ్యం కానుంది. ఈ టెక్నాలజీనే కంపెనీ ఈజీ షిఫ్ట్‌గా వ్యవహరిస్తోంది.

టాటా మోటార్స్ ఇప్పటికే తమ జెస్ట్ కాంపాక్ట్ సెడాన్‌లో ఏఎమ్‌టి టెక్నాలజీని అందిస్తోంది. కాగా.. టాటా నుంచి ఈ టెక్నాలజీతో వస్తున్న రెండవ కారు టాటా నానో కావటం విశేషం. ఈ కొత్త జెనెక్స్ నానో కారులో కాస్మోటిక్ అప్‌గ్రేడ్స్‌తో పాటుగా ఫీచర్ అప్‌గ్రేడ్స్ కూడా ఉన్నాయి.

టాటా నానో జెనెక్స్ ఫ్యూయెల్ ట్యాంక్ సామర్థ్యాన్ని 15 లీటర్ల నుంచి 24 లీటర్లకు పెంచారు. అలాగే వెనుక వైపు ఓపెనబల్ బూట్ డోర్ కూడా ఆఫర్ చేయనున్నారు. ఇంజన్ పరంగా మాత్రం ఈ కొత్త నానోలో ఎలాంటి మార్పులు లేవు. ఇదివరకటి 624సీసీ పెట్రోల్ ఇంజన్‌తోనే ఇది లభ్యం కానుంది.